Park Cafe

Xəzər dənizinin füsunkar sahilində, Bakıdan cəmi 30 km məsafədə yerləşən Sea Breeze kurort kompleksinin infrastrukturunda, Park Residences yaşayış binasında Avropa mətbəxi konsepsiyasını təqdim edən yeni qastronomiya məkanı – Park Cafe fəaliyyət göstərir. Brend-şef Sergey Kondakovun rəhbərliyi altında fəaliyyət göstərən restoran müasir dizaynı və rahat atmosferi ilə seçilir və eyni zamanda 220-yə qədər qonağı qəbul edə bilir.

Restoranın interyeri müasir üslubda tərtib olunub. Beton tavan konstruksiyaları taxta mebellərlə ahəngdar kontrast yaradır, tekstil elementləri və yaşıllıq isə məkana rahatlıq və istilik bəxş edir. Dizayner işıqlandırma sistemi günün istənilən saatında komfortlu atmosfer təmin edir, panoram pəncərələr isə restoranı bol təbii işıqla doldurur. Böyük qonaq qrupları üçün düşünülmüş zonalara bölünmüş məkan hər kəs üçün maksimum rahatlıq yaradır.

Restoranın menyusunda İtaliya mətbəxinin ən sevilən təamları təqdim olunur. Qonaqlar Mortadella pizzası, yaşıl alma və Romano salatı ilə somon tartarı, isti badımcan və pomidor içliyi ilə stracciatella, qara trüf pastası ilə rizotto, brokkoli və Dorblu pendiri ilə dana əti və digər xüsusi təamların dadını çıxara bilərlər.

Zəngin bar menyusunda alkoqolsuz içkilər – limonadlar, təzə sıxılmış şirələr, kokteyllər və yüksək keyfiyyətli çaylar, həmçinin klassik və müəllif kokteylləri, premium köpüklü şərablar və seçilmiş güclü spirtli içkilər təqdim olunur.